Nú er góð helgi senn liðin. Þetta hefur verið nokkurskonar fjölskylduhelgi og tíminn farið að stórum hluta í að leika við afkvæmin og snúast með kerrur og barnavagna.
Það fór samt ekki svo að ekkert væri gert annað, ég komst tvisvar á hjólið í smá stund og svo var slegið gras og svona dúllerí.

Það var þannig í dag að okkur fannst við ná svo skemmtilegum myndum af þeim systrum að við ákváðum að bæta þeim við albúmið – níu nýjar má finna hér, nýju neðst að venju.

Mánudagur á morgun – örugglega skemmtilegur mánudagur, er það ekki annars?

Setti nokkrar myndir frá síðustu dögum inn á júní-albúmið – nýju myndirnar eru neðst eins og venjulega.

Meira er það ekki í dag – enda veður mjög gott og þá er ekkert vit að vera í tölvunni.

Síðasta helgi var viðburðarík fyrir okkur litlu fjölskylduna í Fannagili. Þetta var fyrsta ferð Bryndísar til Reykjavíkur og frumraun okkar Torfa með tvær snúllur í aftursætinu, sem þurftu sína athygli í langri bílferð. Bílferðin suður gekk bara nokkuð vel en tók mun lengri tíma en við höfðum gert ráð fyrir, enda þurftum við núna að skipta um bleyjur á tveimur stúlkum og metta tvo munna … auk þess sem Ragnhildur Edda hljóp um allan Staðarskála og mátti Torfi hafa sig allan við að elta hana.

En við komumst suður og stúlka Ágústsdóttir var skírð 14.júní að viðstöddum flestum af okkar nánustu. Ég fékk að halda á henni undir skírn og ég var hreinlega að rifna úr stolti. Hún lúrði í fangi mínu og svaf gegnum alla athöfnina, en vaknaði svo þegar kom að veisluhöldum og hún fór að “ganga” milli gesta og heilsa uppá ættingja sína. Ég þykist nokkuð viss um að fólk hafi fallið fyrir stúlkunni enda er hún með eindæmum skapgóð og brosmild. Við bjuggum til júní myndalbúm og er það að finna HÉR!

Bryndís fór í 9 vikna skoðun í dag og í ljós kom að hún er ekki svo lítil lengur… orðin rétt tæp 5 kg og 60 sm löng. Hún var þremur mörkum léttari en stóra systir við fæðingu en nú við 9 vikna skoðun er hún aðeins einni mörk léttari… svo hún Bryndís litla stækkar nokkuð hratt þessar vikurnar. Í morgun vaknaði stúlkan með þennan fína hanakamb sem pabbi hennar hafði dundað við að græja í hárið hennar í gærkvöldi. Fer henni bara nokkuð vel – hún er reyndar alltaf kát og glöð, hvernig svo sum hárgreiðslan er.

Í dag varð hún Bryndís okkar tveggja mánaða og í tilefni af því fór litla (stóra) fjölskyldan út að borða í fyrsta skipti frá því að við urðum fjögurra manna eining. Ragnhildur, hin stolta stóra systir, var alveg eins og ljós á veitingastaðnum ef frá er talið að tromma með hnífapörunum, tæta tvær servíettur í 27 hluta, hella úr tannstönglaboxinu á gólfið og eitthvað fleira sem þreyttur faðir man ekkert núna. Bryndís ældi svo á gólfið… en maturinn var mjög fínn.

Svo gerðust þau stórmerki áðan að hún Bryndís litla hló í fyrsta skipti áðan, þá horfðumst við feðgin í augu og stelpan sá sér þann kost vænstan að skella uppúr… í allra fyrsta skipti á ævinni. Hún ætlar að leggja grín fyrir sig í framtíðinni – mikið grín, mikið gaman.

… hvað er að gerast, það bara svoleiðis mokast inn myndir – tvær viðbætur sama daginn. Þetta hefur ekki gerst í háa herrans tíð.

Var að setja inn myndir af Ragnhildi og Bryndísi, níu myndir sem ég bætti við maí albúmið sem má finna HÉR – nýjustu myndirnar neðst.

Svo ein góð sem var tekin núna í kvöld, Ragnhildur að lesa fyrir Bryndísi… fyrir svefninn:

… og komið sumar – og hægt að fara bæði á sleða og hjól að vild. Það er að segja ef maður hefur tíma milli þess að stunda vinnu og sinna dætrum .

Í tilefni af þessu öllu saman ákvað ég að setja inn nokkrar myndir frá vetrinum – þær má finna HÉR. Aldrei þessu vant eru engar myndir af stelpunum í þessum pakka.. nei, þetta er myndir úr leikferðum vetrarins, sportferðir húsbóndans.

Það var dagmömmudagur á Kristnesi í dag. Þá taka sig saman dagmömmur og drífa krakka og foreldra í sveitaferð að skoða dýrin og girðingarnar. Nunnurnar voru þar engin undantekning og við mættum með báðar stelpurnar. Þetta fannst Ragnhildi ekkert lítið gaman… eins og sjá má á myndum sem ég var að bæta við sama albúmið og í gær. Nýju myndirnar eru neðst – albúmið er hér.

Við fengum okkur bíltúr í dag litla fjölskyldan. Ferðinni var heitið í Gautlönd þar sem sauðburður stendur sem hæst, þrjár að bera og allt í fullum swing. Ragnhildur og Bryndís voru að sjá eina gagnlegustu skepnu sem þrífst á þurru landi, sauðkindina, í fyrsta skipti… í návígi. Ragnhildur var svolítið smeik fyrst en eftir smá stund var hún búin að hoppa niður í stíuna og farin að klappa einni enda áttaði hún sig fljótlega á því að sauðir eru jú sauðmeinlausir.

Myndir frá deginum hefur verið bætt við maí albúmið – þær má finna HÉR - athugið að nýju myndirnar eru neðst.

Við þökkum svo Bjössa, Sísý og Fíu fyrir móttökurnar, félagsskapinn, myndatökuna og lánið á Thumpstar hjólinu .

Í Fréttablaðinu í dag er fjallað um þjófa við Ylströndina. Fyrsta setningin er:
“Hjólreiðaeigendur sem hafa sleikt sólina undanfarna dag í sólinni á Ylströndinni hafa margir hverjir snúið til baka reiðhjóli fátækari“.

OK… hjólreiðaeigendur… ég á reiðhjól en ég veit ekki til þess að nokkur maður eigi hjólreið! Höfundur skrifar einnig undanfarna dag – og vantar því eitt “a”, en líklegast er það yfirsjón. Svo til að toppa þetta hafa þessir blessuðu hjólaeigendur sleikt sólina í sólinni.

Hversu illa er eiginlega hægt að klúðra einni setningu?

Nú er bara brostið á sumar… og samt er maður ennþá á fullu í sleðatúrum. Brá mér uppá Kerlingu á sleða í fyrradag og aftur í gærkvöldi – það er bara svo ansans gaman að þeytast uppá þessi fjöll og horfa í kringum sig í blíðunni. Í gærkvöldið var blóðrauður himinn og allt eins og á póstkorti .

Lífið í Fannagilinu hefur svo gengið sinn vanagang – þ.e. ef vaninn er að vera með tvær smástelpur sem þarf að hafa talsvert fyrir. Ragnhildur tók uppá því að ná sér í hlaupabólu og var því heima lungann úr síðustu viku. Hún var farin að sakna nunnanna sinna verulega þegar hún fékk lokst að fara til þeirra aftur á föstudaginn. Alda og Derek eru svo í heimsókn hjá okkur núna og taka langa helgi þannig að þá er farið í garðvinnu af miklum móð þar sem þau eru græn uppað öxlum – synd að nýta það ekki þegar það býðst.

Svo eru það myndirnar (fyrir langafa) – nýtt myndaalbúm af þeim systrum má finna hér!

Hún Bryndís okkar er mánaðar gömul í dag og braggast vel. Hún reyndist vera orðin 3,5 kg í síðustu vigtun sem okkur þykir bara ansi gott. Hún sefur, drekkur og óhreinkar bleyjur… jafnvel allt í sömu andrá enda fjölhæfur kvenmaður hér á ferð. Það hefur hinsvegar reynt töluvert á okkur foreldrana undanfarna viku þar sem Ragnhildur eyddi fleiri stundum á bráðamóttöku FSA en á dagheilmilinu sínu. Þegar við svo loksins fengum barnalækni til að líta á hana komst hann að því að hún væri með lungnabólgu. Nú er svo bara að vona að pestatíð sé lokið í bili.

Til gamans eru hér tvær myndir af þeim systrum á svipuðum aldri í sama gula balanum. Systrasvipur með þeim en þær hafa samt sín séreinkenni.