Stelpurnar eru alsælar með páskafríið og nýkomið sumar. Ragnhildur Edda er farin út í hjólatúr með pabba sínum og Bryndís Eva sefur í vagninum. Það stefnir allt í að við þurfum að koma staðsetningartæki fyrir á hjólinu hennar Ragnhildar þar sem hún á það til að laumast út og halda á vit ævintýranna. Hún var reyndar ekki orðin tveggja þegar þessi leiðangursþörf hennar kom í ljós, en þá komst hún bara ekki sérlega hratt yfir svo við náðum henni alltaf á endanum. Held að GPS sé málið núna.
Nokkrar myndir í tilefni sumars – stelpurnar fengu prinsessu regnhlífar og náttkjóla í sumargjafir og voru bara nokkuð sáttar.
Eva - 22 April, 2011 | 2 Comments »
Við héldum upp á afmæli litlu Bryndísar Eva um dagin, nánar tiltekið á hinum örlagaríka Icesave kosningadegi. Bryndís var að vonum alsæl með athyglina og gjafirnar, þó að litlir forvitnir gestir hafi verið helst til óþolinmóðir með að bíða eftir stúlkunni meðan hún dundaði sér við að taka utan af gjöfunum. Hér koma svo nokkrar myndir af afmælisbarninu í veislunni sinni.
Eva - 13 April, 2011 | 1 Comment »
Litla stelpan okkar varð 2 ára í dag og lék við hvers sinn fingur. Hún fór með íspinna til allra krakkanna á dagheimilinu og fékk svo páskaegg í eftirmat. Hún var alsæl með daginn og söng sig í svefn. Ég ákvað að nota tækifærið og fara yfir myndir af skvísunni, allt frá fæðingu og er niðurstaðan hérna – ein mynd fyrir hvern mánuð í lífi hennar. Eins og sést á þessu safni þá fæddist hún með sterkan svip og hefur haldið honum þessi 2 ár, mér finnst hún lítið hafa breyst… bara stækkað aðeins og lært heilmikið. Hún er komin með dágóðan orðaforða og getur lagt fram allar þær kröfur sem henni detta í hug… og þær eru ófáar. Hún kann að telja upp í sirka 12, en sleppir þó 7 og 10 – finnst hreinlega óþarfi að hafa þær með. Hún kann nokkra liti, rauðan, bláan og bleikan, og síðast en ekki síst er hún einstaklega góð í því að veita knús og kossa.
Eva - 5 April, 2011 | 5 Comments »
Við eigum tvær stelpur. Ég er strákur.
Ég er mjög ánægður með stelpurnar mínar og vildi ekki fyrir nokkurn mun eiga nokkuð annað en nákvæmlega þessar tvær stelpur. Hingaðtil hafa þær báðar verið fyrirmyndar smábörn (sagt eins og smábörn séu almennt til fyrirmyndar) og verða það líklega um nokkurt skeið. Ég hef ekki átt í teljandi vandræðum með að skilja þær – umfram almenna tungamálaörðugleika og áberandi skilningsleysi þeirra á sumum aðstæðum.
… svo gerðist það á nýársdag. Við vorum í heimsókn hjá Hildi og Óla (sem eiga einmitt líka tvær stelpur) og upp úr þurru, alveg upp úr þurru, þegar Sigrún (3ja ára) þurfti að fara á salernið að sinna kalli náttúrunnar þá sagði Ragnhildur (3ja ára) það sem svo margar kynsystur hennar hafa sagt:
“ég kem með”
Þá er það byrjað, ég veit ekki hvað gerðist – en þetta virðist vera djúpt í kveneðlinu að fjölmenna á salerni, ekki kenndi ég henni þetta svo mikið er víst.
Torfi - 5 January, 2011 | 8 Comments »
Ragnhildur Edda fékk flottan sleða í jólagjöf og vildi rjúka samstundis út í myrkrið að renna sér. Okkur tókst þó að semja við hana um að setja gripinn saman á jóladagsmorgun og fara út að renna okkur um leið og birti. Við drifum okkur því út um leið og smá skíma kom og skemmtum okkur frábærlega í litlu brekkunum hérna allt í kringum okkur – þetta reyndist líka vera fínasta líkamsrækt fyrir okkur “gamla settið”. Hér koma nokkrar myndir af æfingunum… og svo nokkrar af stelpunum í nýjum föt sem komu uppúr jólapökkunum. Eins og sést er mikið sport á þessu heimili að vera eins 
Eva - 26 December, 2010 | 1 Comment »
Við óskum vinum og vandamönnum gleðilegrar hátíðar og þökkum liðið. Vonum að þið hafið haft það gott yfir hátíðirnar, þó að fríið sé heldur stutt þetta árið.
Eva - 25 December, 2010 | No Comments »
Það var jólaball með öllu tilheyrandi á leikskólanum hennar Ragnhildar Eddu í síðustu viku. Hún var mjög spennt og var tiltölulega auðvelt að fá stúlkuna til að klæða sig í þetta skipti, enda hafði henni verið lofað því að hún mætti velja sér kjól. Alla jafna þarf hún að fara í buxum á leikskólann sem henni þykir óskaplega óspennandi, jafnvel þó þær séu bleikar með Hello Kittý mynd.
Ragnhildur valdi sér gulan stuttermakjól… og var mjög ákveðin í því að guli kjóllinn væri sá eini rétti. Hún stakk því skemmtilega í stúf þegar hún mætti á leikskólann og öll hin börnin voru klædd í dökk jólaföt. Ég fann þessar myndir á heimasíðu Tröllaborga.
Eva - 20 December, 2010 | No Comments »
Við fórum með stelpurnar í jólamyndatöku um helgina sem gekk við fyrstu sýn ekkert svo stórkostlega vel en þegar ég skoða myndirnar aftur þá er þetta fullkomið myndasafn af hispurslausum og kátum stelpum. Þarna eru fallegar myndir, jólalegar myndir, myndir með leikrænum tilburðum, kátar myndir og svo auðvitað myndir þar sem einhver verður fúll og snýr bara baki í myndavélina…. Hér eru nokkur sýnishorn en þetta eru algjörlega hráar myndir beint úr vélinni okkar – á sem sagt eftir að snurfusa þær aðeins í myndvinnslu.
Eva - 13 December, 2010 | 4 Comments »
Ragnhildur Edda fékk að fara í jólakjólinn sinn í morgun og bregða sér á jólaball þar sem dansað var kringum jólatré og sungin jólalög. Svo komu Stekkjastaur og Giljagaur í heimsókn og voru sum börnin mjög spennt fyrir þeim á meðan önnur voru dauðskelkuð. Ragnhildur Edda hélt sig til hlés þegar sveinarnir mættu og laumaðist svo að smákökuborðinu og náði sér í smakk þegar enginn sá til. Hún stóð sig mjög vel sú stutta og lék sig við hina krakkana á meðan ég var upptekin við að þjónusta liðið.
Nokkrar myndir af heimilislífinu undanfarna daga og svo frá jólaballinu.
Eva - 5 December, 2010 | No Comments »
Þakkagjörðarhátíð Bandaríkjamanna er á morgun en við héldum upp á daginn um síðustu helgi í góðra vina hópi. Þessi vinahópur hefur komið sér upp þeirri góðu hefð að hittast og eyða heilum degi í eldamennsku og át svona um það leyti sem Bandaríkjamenn eru með sitt Thanksgiving. Þar sem hópurinn er orðinn ansi stór – telur 17 manns fundum við veiðihús miðja vegu milli Reykjavíkur og Akureyrar þar sem við eyddum helginni og elduðum kalkún að hætti Kanans. Matseðillinn var eitthvað á þessa leið:
- Pönnukökur með nutella, kókós, jarðaberjum og bönunum í forrétt (eða hádegismat)
- Kalkúnn með sykurpúðanhúðaðri-sætkartöflustöppu, waldorfsalati, sósu, stöffing og gulbaunabrauði
- Súkkulaðikaka, ávextir, ís, súkkulaðisósa og nóakropp.
Vanir þakkagjörðarmenn taka eftir að ekki var boðið upp á graskersböku, en þeir vita jafnframt hvers vegna.
Myndir frá þessari frábæru helgi.
Eva - 24 November, 2010 | 1 Comment »
Vildi koma hér nokkrum orðum á blað á meðan ég er með þau í kollinum. Bryndís Eva er komin með dágóðan orðaforða og skilur meir en margur. Hér er smá sýnishorn.
babbi – pabbi
minna – meira
gei – skeið
gó – skór
billa – bleyja
gekka – drekka
bola – bolur
lóló – róló
jóla – hjóla
og svo auðvitað er fullt af orðum sem hún ber óaðfinnanlega fram eins og að sjálfsögðu “mamma”, auk orðanna “hæ”, “bæ”,”nei” og “út”… alltsaman mjög mikilvægt. Orðið “já” hefur tekið á sig nokkrar myndir – “ahmm” hefur verið vinsælt fyrir “já” en stafurinn “á” hefur verið meira notaður fyrir “já” undanfarið og ýtt “ahmm-inu” út.
Eva - 11 October, 2010 | 6 Comments »
Fyrst ber að nefna að á föstudaginn þá eignuðust Bjössi og Sísý ljómandi fína stúlku. Mikil lukka með það 
.
Hildur og Óli voru svo hjá okkur um helgina með stúlkunar sínar þær Þórdísi og Sigrúnu. Þórdís var á miklu strengjasveita móti og sást lítið enda í nógu að snúast.
Það var mikið grín á heimilinu með alla gestina og Ragnhildur og Bryndís voru í essinu sínu allan tímann eins og vera ber. Það var rólað, dansað, hjólað, hlaupið og hlegið heil ósköp.
Myndir:
Torfi - 10 October, 2010 | 1 Comment »
